بڑھتی عمر کے ساتھ چہرے اور آنکھوں کے نیچے جھریوں کا ہوجانالازمی بات ہے تاہم اب لگتا ہے کہ یہ ماضی کا قصہ بننے والا ہے۔ جی بالکل ایک امریکہ میں طبی تحقیق میں اس حوالے سے کامیاب تجربہ کیا گیا ہے۔ ایم آئی ٹی، میساچوسٹس جنرل ہاسپٹل، لیونگ پروف اور اولیوو لیبز کی مشترکہ تحقیق میں ایسی ‘ سیکنڈ اسکن’ تیار کی گئی ہے جو چہرے کا نوجوانی کا تاثر بحال کردیتی ہے۔ یہ درحقیقت ایک ایسا میٹریل ہے جسے چہرے پر کسی بھی کریم کی طرح روز لگایا جاسکتا ہے اور پھر اسے ایک جیل کی مدد سے متحرک کردیا جاتا ہے جو جلد کو فوری کھینچ دیتا ہے اور چہرہ جوان نظر آنے لگتا ہے جبکہ جھریاں غائب ہوجاتی ہیں۔ اگرچہ اس میٹریل کو رات کے وقت اتارنا پڑتا ہے مگر اس کی تہہ دن کے وقت جلد کی نمی کو بہتر کرتی ہے اور طویل المعیاد بنیادوں پر بتدریج جھریاں حقیقت میں ختم ہونے لگتی ہیں۔محققین کو توقع ہے کہ اسے جلدی امراض وغیرہ کے لیے استعمال کیا جاسکے گا جبکہ یہ سورج کی شعاعوں سے تحفظ میں بھی کام آنے والا طریقہ کار ثابت ہوگا۔محققین اس میٹریل کی تیاری کے لیے 10 برس سے کام کررہے تھے جس کے کامیاب تجربات اب کیے گئے ہیں۔تجربات کے دوران رضاکاروں پر اس سکینڈ اسکن کے استعمال سے لوگوں کے آنکھوں کے نیچے بھاری پن اور جھریوں کو ختم کرنے میں کامیابی ملی۔محققین کے مطابق یہ نادیدہ تہہ جھریوں کے لیے رکاوٹ، جلد میں بہتری کا باعث بنتی ہے۔اس میٹریل کو ایکس پی ایل کا نام دیا گیا ہے اور یہ جلد پر 24 گھنٹوں تک کے لیے لگایا جاسکتا ہے۔محققین کو توقع ہے کہ یہ بہت جلد عام فروخت کے لیے دستیاب ہوگا اور اس کے استعمال سے جھریاں ماضی کا قصہ بن کر رہ جائیں گی۔اس تحقیق کے نتائج طبی جریدے نیچر میٹریلز میں شائع ہوئے۔
