نیو یارک (مانیٹرنگ ڈیسک ) ایک نئے فیچر کے مطابق کہ اب آپ فیس بک استعمال کریں یا نہ کریں مگر سماجی رابطے کی یہ ویب سائٹ انٹرنیٹ استعمال کرنے والے ہر فرد کی ٹریکنگ کرکے اس کے سامنے اشتہارات پیش کرسکے گی۔ یہ معروف ویب سائٹ پہلے بھی دنیا بھر میں لوگوں کی ٹریکنگ کرکے ڈیٹا اکھٹا کرتی تھی اور اسے مخصوص سائٹس پر وزٹ کے دوران اشتہارات دکھانے کے لیے استعمال کرتی تھی ، مگر اب اس نے پاﺅں پھیلاتے ہوئے ہر ایک تک رسائی حاصل کرنے کا فیصلہ کر لیا ہے چاہے وہ فیس بک استعمال نہ بھی کرتا ہو، دراصل اب فیس بک پلگ انز اور کوکیز کے امتزاج کے ذریعے انٹرنیٹ صارفین کا تعاقب کرے گی چاہے وہ جو مرضی ویب سائٹ اوپن کریں، اس کے بعد وہ انہیں ایسی ویب سائٹس پر جانے کی صورت میں اشتہارات دکھائے گی جو اس کے ‘ آڈینس نیٹ ورک’ ایڈ اسکیم میں شامل ہیں۔ اس فیصلے سے فیس بک کو اشتہارات کے معاملے میں گوگل کے مقابل آنے میں مدد ملے گی جو انٹرنیٹ بھر میں اپنی اشتہاری کمپنیوں کے اشتہارات دکھاتا ہے، فیس بک کو توقع ہے کہ وہ گوگل سمیت دیگر نیٹ ورکس کو اپنے پاس موجود بڑی مقدار میں ڈیٹا کے باعث شکست دے سکے گی۔ فیس بک کے ذرائع کا کہنا ہے کہ ہمارے پاس ایک ارب سے زائد صارفین موجود ہیں جنھیں ہم جانتے اور سمجھتے ہیں، تو ہمارے پاس اس طرح کےپروگرام کی کامیابی کے لیے زیادہ مواقعے موجود ہیں۔
